Пред четири месеци, осомничениот и уапсен командир на прилепската Полициска станица за инволвираност во трговија со дрога, во вредност од 800.000 евра, при големата акција која се случи на Плетвар, со асистенција од американската ДЕА, веќе трет ден се наоѓа во домашен притвор. Според одбраната на осомничениот, судија на претходна постапка, а согласно досегашниот тек на истрагата и прибавените докази, донел одлука за замена на притворот со куќен притвор без никакви посебни мерки, освен забраната да не го напушта живеалиштето.
„До 8-9 септември треба да има и Одлука. Јас очекувам дека нема да биде продолжен притворот, бидејќи нема ни основа. После 8-ми, ако не и претходно, ја чекаме одлуката од ОЈО дали ќе ја запре истрагата за него или не. Ако ја запре истрагата, значи дека тој си е чист“, – ни изјави Жаре Стеваноски, адвокат на осомничениот командир Кире Спиркоски – Чипсио, притоа додавајќи дека ако се докаже невиноста на осомничениот командир, не е исклучена можноста да следат и соодветни кривични пријави за незаконската постапка.
Во меѓувреме, како што веќе информираше Алфа, мнозинството советници од владеачката партија на вонредна седница на Советот на општина Прилеп, на почетокот од месецов, на незаконски начин, се обиде да назначи нов командир на ПС-ОН, и покрај тоа што претходниот не беше разрешен, а работното место му беше ставено во мирување. Ова Решение на Советот, по укажувањето на правните експерти дека е флагрантно кршење на Законот за Полиција и дека повлекува кривична одговорност, градоначалникот Илија Јованоски одби да го потпише, па во еден краток период ПС во Прилеп, беше единствената станица со двајца командири. По ова, како што дознава Алфа, министерот за Внатрешни работи кој го има дискреционото овластување да разреши командир, итно реагирал и го разрешил стариот и во моментов осомничен командир, а работното место му е останато во мирување се’ до завршувањето на кривичната постапка која се уште се води против него.
Познавачите на состојбите велат дека сета оваа „игранка“, најверојатно се случувала заради престојните избори, односно дека некој сакал итно да го „тргне“ стариот командир и да го назначи новиот, што не било и чудно, ако се имале предвид се’ поочигледните чистки помеѓу моќни крила во партијата на власт.
Инаку, во големата акција на Плетвар, која се случи на 9-ти април годинава, освен командирот на прилепската ПС, уапсени беа уште пет други лица. Помеѓу нив бил и возачот на братучедот на премиерот, Трајче Заев, Александар, тврдеше тогаш опозицијата.
Каролина Дурло