Mакедонската метропола „каска“ зад другите, Скопје тоне во сивило во пресрет на Новогодишните празници
Македонија во сивило пред Новогодишните празници. Додека регионот и светот се радуваат за наближување на Новата Година, кај нас, само одредени општини поставија елка, но не и главниот Град. Во недостаток на празничната магија, изминатиот продолжен викенд граѓаните ги наполнија Солун и Белград.
На само три недели до Новата година, македонската метропола сè уште не е украсена. Без празнична еуфорија, на Скопје му се случува истата песна како лани, кога се чекаше 5 до 12, за колку толку да се дека по некоја улица светнува.
Во моментот на централниот плоштад владее сивило. Божиќен базар нема, а улиците во центарот на градот зјаат празни, без елка, светилки и новогодишни украси. Ваква е сликата сега во Скопје, тажна и без никаква еуфорија.
И додека во Градот и натаму не се чувствува позитивна новогодишна енергија, надлежните не ни најавуваат кога ова би се променило. На прашањата на Алфа одговор не стигна.
Граѓаните сакаат градот да биде украсен и накитен, по теркот на соседите, за колку толку да се почувствува дека ја оставаме, за многумина, тешката година зад нас.
- Ова е сивило сега и мора да се додаде душа на градот. Сигурно дека треба да се украси, и тоа како и секоја друга метропола. Прво да се исчисти, после да се украси. Гледајте што прават помалите општини, а Скопје, на што личи ова, катастрофа, реагираат граѓаните пред камерата на Алфа.
Скопјани велат дека мора локалната власт да покаже поголема сериозност, и барем малку да се огледа на европските метрополи.
Инаку, и лани Скопје почна да се украсува дури по 15. декември. За годинава останува да почекаме да видиме кога тоа ќе се случи. Чудно е што метрополата е завиена во сивило, додека одредени помали општини поставија елка, и ги украсуваат плоштадите. Во регионот, пак, веќе се чувствува празничната атмосфера.
Покрај соседните Белград, Софија, Тирана и Атина, новогодишна магија владее и во Амстердам, Лондон, Рим, Париз, Барселона. Во новогодишен сјај е дури и Киев кој светна и покрај двегодишната војна.
Борис Грујоски