Управен е на потег – Дали ќе се стопира селекцијата на кандидатите за судии и обвинители во изборен процес?

По последната одлука на Антикорупционерите дека Академијата „Павел Шатев“ ги крши законите затоа што тера селекција и тестирање на кандидатите за судии и обвинители среде избори, сега се е во рацете на Управен суд.  Доколку директорката на Академијата Наташа Габер по вторпат поднесе тужба до Управен како што најави вчера, судот ќе мора да донесе конечна одлука и согласно Законот за управни спорови нема да може да го врати предметот на повторно одлучување, појаснува поранешната судијка Вера Коцева. Согласно законските измени од 2019, Управен суд не може повеќе да одлучува до бескрај и да ги враќа предметите, па така за краток период, судот ќе мора да донесе конечна одлука, вели таа.

Во однос на тврдиот став на директорката Габер, а и на одлуката на Управниот суд, дел од правната фела критикува дека станува збор за очајнички обиди да се брани нешто што не може да се одбрани. Адвокатот Сашо Дуковски вели дека со вакви потези се креира лоша слика во јавноста за функционирањето на правосудството.

Примање на нова генерација слушатели на Академијата за судии и јавни обвинители наиде на критика од страна на новиот состав на антикорупциска и претседателката Татјана Димитрова кои одлучуваа по приговор на кандидатката за шеф на државата, Гордана Силјановска Давкова.

Откако антикорупционерите пресекоа дека вработување на слушателите среде изборна кампања е незаконско, директорката Габер поднесе тужба до Управен суд. Откако судот пресече и предметот го врати на повторно одлучување кај антикорупционерите, тие донесеа идентична одлука дека процесот е незаконски.

Досега во Академијата поминаа голем број на новоизбрани судии и обвинители, од кои речиси над 80 % се сопруги, синови и ќерки на функционери, и на пензионирани или актуелни судии и обвинители.