Во с.Небрегово, одбележана 99-годишнинаната од раѓањето на стожерот на македонскиот јазик и азбука, Блаже Конески

       „Не смее да се изневерува својот народ, зашто неговиот јазик ни е единствената наша целокупна татковина“, своевремено рекол стожерот и кодификаторот на македонскиот јазик, азбука, граматика и правопис, Блаже Конески, кој на 19-ти декември, точно пред 99 години бил роден во прилепското село Небрегово и кој целиот свој живот го посветил токму на таа кауза, а чие дело пак, благодарение на актуелните, искривени политики, се повеќе е на удар од нашите соседи.

    „Морам да ја повторам мислата на Блаже Конески дека не може на едни да им се оддава признание за својот јазик и својата култура, а на други да им се одзема тоа право. Ние Македонците ќе зборуваме македонски јазик додека постоиме…..Се работи практично за еден мит кој што влече свои корени од средниот век и се разбира, митот се обновува со т.н. Сан-Стефанска Бугарија, која што никогаш и не постоела, и тој мит потоа се обновува во текот на националистичкиот период и во царска Бугарија, и за жал и во комунистичка, современа Бугарија и со тоа си решеваат некои свои домашни проблеми, мислам на Бугарија“, – изјави проф.д-р Људмил Спасов, од Советот за македонски јазик при Владата на РМ.

     Дека македонскиот јазик не е никаков дијалект на бугарскиот, потврдуваат и од Институтот за македонски јазик, “Крсте Петков – Мисирков“.

   „Македонскиот јазик си има свој континуитет од 9-от век до денеска. Со развојот на првата словенска писменост, старо-словенскиот јазик, преку македонската варијанта на црковно-словенскиот јазик, 19-от век, преродбениците, 20-от век, 1903-тата, книгата на Крсте Мисирков – „За македонцките работи“, која што всушност претставува прва и неофицијална кодификација на македонскиот јазик и последната кодификација на нашиот Блаже Конески“, – децидна е Елена Јованова- Грујовска, директор на Институтот за македонски јазик „Крсте Петков- Мисирков“.

      Постоењето на македонизмот и на Македонците пред 1945-тата, не е спорно дури ниту за владиниот Национален координатор за интеркултурализам, Роберт Алаѓозовски.

     „Се разбора дека македонската нација, македонскиот народ си има своја етно- генеза. Ние имаме право да се повикуваме на таа етно-генеза. Тоа е јасно и тоа е утврден факт, така што нема отстапување на тоа“, посочува Роберт Алаѓозовски.

       А на својот Блаже Конески пак, особено се горди неговите соселани.

       „Што има да се кажува за Блаже Конески…се е кажано…Дури и светот, мислам како светски, не како од Небрегово, како македонски писател го знае…Блаже Конески, тој како дете овде основно завршил и после Прилеп пошол…па Скопје...“, –  вели Жарко Конески од Небрегово.

        Инаку, родната куќа на Блаже Конески во Небрегово, од 2005-та година е Спомен-куќа која е уредена во автентичен стил со богата музејска поставка која целосно го отсликува неговиот живот, се до неговата смрт во 1993-та година.

Каролина Дурло