ВМРО-ДПМНЕ нуди укинување на техничката влада – криминалното ДУИ не треба да номинира премиер

Нема веќе потреба од техничка Влада, понижувачки е за Македонија премиер да биде на предлог на ДУИ, партија со најголем број скандали во државата, смета лидерот на опозицијата Христијан Мицкоски. Тој е подготвен да се откаже и од министерските места кои и следуваат на ВМРО-ДПМНЕ, бидејќи веќе се губела поентата од техничка Влада, која носела само проблеми.

За мене е понижувачки како граѓанин, како политичар, партијата која што во последно време е во центар на скандалите, а тоа е ДУИ да номинира премиер. Не гледам каков квалитет може тој премиер да донесе и каква додадена вредност. Во техничката Влада има повеќе опструкции отколку нешто кое што може да додаде вредност во процесот – изјави Христијан Мицкоски – претседател на ВМРО-ДПМНЕ.

Ваквиот став на Мицкоски доаѓа на два месеци пред денот кога во премиерското столче на местото на Димитар Ковачевски, треба да седне човек предложен од Али Ахмети, за што согласност има и кај двете главни владејачки партии, откако тоа беше пред три години договорено меѓу лидерот на ДУИ и тогашниот премиер Зоран Заев.

Иако опозицијата подолго време предлага да се промени законот за Влада и да се укине пржинскиот модел, токму договорот Заев – Ахмети за технички премиер Албанец е пречка за ова.

Инаку, според договореното меѓу СДСМ и ДУИ, доколку изборите се одржат на осми мај, тогаш техничкиот премиер кој ќе дојде на предлог на ДУИ на Илинденска треба да седне на 29 јануари.