Газа е гробница за деца – очајни апели на ОН за прекин на војната

Генералниот секретар на ОН Антонио Гутереш истакна дека заштитата на цивилите мора да биде најважна во конфликтот меѓу Израел и Хамас, предупредувајќи дека Газа станува гробница за децата.

„Мораме да дејствуваме сега за да најдеме начин за излез од овој брутален, ужасен, мачен ќорсокак на уништување. Газа станува гробишта за деца. Стотици девојчиња и момчиња се убиени или ранети секој ден“, рече Гутереш и повтори дека се прекршуваат јасните меѓународни хуманитарни закони.

Камиони со хуманитарна помош полека влегуваат во Газа од Египет преку преминот Рафах, главниот граничен премин кој не се граничи со Израел. Но, претставници на ОН постојано тврдат дека тоа е недоволно за цивилното население во Газа од околу 2,3 милиони луѓе, од кои повеќе од еден милион останаа без покрив над главата.