Почна гласањето за двојните избори, гласаат болните, немоќните и затворениците

Утрината во седум часот почна гласањето за двојните избори. Правото на глас денеска го користат болните и немоќни лица во домашни услови и затворениците. Избирачките места во затворите се отворени во 7, а ќе се затворат во 19 часот. За вториот круг на претседателските и за парламентарните избори зголемен е бројот на пријавени болни и немоќни лица, кои денеска ќе ги посетат членовите на избирачките одбори, за да гласаат во домашни услови.

Според податоците на ДИК за претседателските избори ќе гласаат 11.123, а за парламентарните избори бројката на болни и немоќни лица е поголема за 102 избирачи или ќе гласаат 11.225 болни и немоќни лица. На 8 мај на избирачките места ќе има две гласачки кутии, едната за избор на нов претседател, а втората за избор на пратеници.

Гласачите ќе имаат право само еднаш да пристапат до избирачкото место. На 8 мај, на вториот круг од претседателските избори право на глас имаат еден милион 814 илјади 317 избирачи, додека на парламентарните избори милион 815.350 избирачи. Разликата во гласовите е 1 033, генерално поради граѓани кои стекнуваат полнолетство. во посебните изводи од избирачкиот список за лица кои поднеле пријава за гласање во дипломатско конзуларните претставништва или конзуларни канцеларии се запишани 2.569 избирачи, а во затворите 2.147 избирачи. Запишани се и 534 избирачи згрижени во установите за вон семејно згрижување, а во избирачкиот список запишани се и две внатрешно раселени лица.