Џафери иницира онлајн собрание – опозицијата останува на ставот за физичко присуство во парламентот

Ќе се исполни ли желбата на Власта, наместо пратениците да одат во собрание на работа, да гласаат и дискутираат од дома онлајн? Спикерот на Собранието Џафери достави предлог за дополнувања на собранискиот Деловник, по скратена постапка. Вели , заради состојбата со Ковид 19, законодавниот дом мора да се приспособи кон новонастанатата состојба.

Од ВМРО-ДПМНЕ велат дека ваквиот предлог е спротивен на законот, но и на Уставот. Координаторот на пратеничката група на најголемата опозициска партија, Мицевски вели дека зад превезот на пандемијата, власта сака да се гласа онлајн, оти имале тенко мнозинство. Предлогот на Џефери се уште не го разгледале.

Сличен став како ВМРО-ДПМНЕ дели и Алијансата на албанците. Ни тие не го разгледале предлогот, но стојат на ставот дека местото на пратениците е во Собранието. И од таму сметаат дека тенкото мнозинство е причина плус за да се иструка оваа промена на деловникот.

Џафери утрово не откри кога неговата иницијатива ќе се најде пред пратениците на гласање, вели ќе чека народните избраници да го разгледаат предлогот, па потоа ќе го стави на дневен ред.

Тој појаснува дека неговиот предлог е во насока на непречено одвивање на  работата во Собранието и се однесува само за пратеници кои поради ковид-19 нема да можат да учествуваат на седниците на Собранието и на комисиите и ќе бидат на домашно лекување или во домашна изолација. Пратениците тоа ќе мора да го докажат со решение од Државниот санитарен и здравствен инспекторат.

За предлогот на Џафери, од СДСМ дадоа поддршка и побараа сите пратеници да изгласаат промена на деловникот за да може собранието да функционира.

Во моментот, според информациите од Собранието, шестмина пратеници не се во можност да учествуваат во работата на парламентот поради Ковид-19.

Meри Ѓорѓиевска