НБРМ: Денарот е и ќе остане стабилен, нема промени на курсот

Денарот како валута е стабилен и ќе остане стабилен. Промени на нивото на неговиот девизен курс нема – информира Народната Банка. Ваквата реакција доаѓа откако на неколку портали и на социјалните мрежи беше објавена и коментирана лажна вест дека тој изгубил вредност.

Од Народната банка велат дека девизните курсеви на онлајн платформите кои беа предмет на коментари не се релевантен извор за следење на вредноста на денарот. Единствен релевантен извор на информации според којшто населението и фирмите може да го следат девизниот курс на домашната валута е курсната листа која НБРМ ја објавува на нејзината интернет страница. Во моментов, средниот курс на еврото во денари изнесува 61,69 денари.

НБРМ апелира на совесно и одговорно информирање и проверка на вистинитоста на изворите на информации. Предупредува дека секое произволно толкување на информациите во врска со домашната валута може да креира негативни ефекти за економијата.

„Девизниот курс на денарот е стабилен и нема промени во неговото ниво. Во повеќе наврати истакнавме дека располагаме со низа инструменти со коишто гарантираме дека девизниот курс на денарот во однос на еврото ќе остане стабилен. Потсетуваме дека девизните резерви коишто се клучни за одржување на стабилноста на курсот на домашната валута се на високо ниво, и тоа двојно повисоко од пред глобалната економска криза во 2008 година“ – стои во соопштението од Народната Банка.

На крајот на февруари 2020 година, официјалните девизни резерви изнесуваат 3,08 милијарди евра. Најголем дел од нив се пласирани во хартии од вредност (81,1%) по што следува монетарното злато (10,7%) и валутите и депозитите (8,1%).