Европските дипломати во Словенија ќе понудат утешно решение за Балканот, но не и гаранции за прием

Нема влез во ЕУ за Македонија и земјите од Западен Балкан додека Унијата не се реформира. Наместо гаранции, нови услови, но овој пат за Европската Унија.  Дека земјите нема да имаат целосно јасни шанси за полноправно членство ќе има и на писмено, бидејќи Франција сака да ја задржи можноста да го блокира приемот на нови членки доколку ЕУ во наредните години не се реформира согласно француските очекувања, и бара тоа да влезе во декларацијата која треба да биде објавена по синоќешните долги разговори и преговори. Германската агенција ДПА повикувајќи се на свои извори во германската дипломатија објави дека ова е еден од главните услови. Колку и да се спремни земјите од Западен Балкан, нивната ЕУ перспектива ќе зависи од тоа колку и како ќе се развива целата Унија.

Во нацрт верзијата на Декларацијата за Самитот, ЕУ ја потврдува својата недвосмислена поддршка за европската перспектива на Западен Балкан, но и ригорозната  условеност.

„ЕУ ја потврдува својата посветеност кон процесот на проширување и нејзините одлуки донесени врз основа на веродостојни реформи од страна на партнерите, правична и ригорозна условеност и по принципот на сопствени заслуги“ – стои во нацрт верзијата.

Како што јавува ДПА, другите точки од декларацијата кои главно се однесуваат на демократијата, владеење на правото, јакнење на граѓанското општество и плурализмот на медиумите не биле спорни за претставниците на членките на ЕУ кои преговарале во текот на ноќта, во очи на утрешниот Самит ЕУ-Западен Балкан во Словенија

Дека Унијата не може да даде гаранција за идно членство на шесте балкански земји покажува и Декларацијата која претходно ја објави Ројтерс, повикувајќи се на свои дипломатски извори, според која се вели дека Унијата плашејќи се од политички реакции во земјите-членки веќе не може да се согласи да даде гаранции за земјите од Западен Балкан да станат дел до европското семејство.

Адријана Алексиеска