„Еуровиа“ ќе ги гради автопатите – ќе биде подизведувач на „Бехтел и Енка“

„Еуровиа“ ќе биде подизведувач на конзорциумот „Бехтел и Енка“. Заедно со „АК инвест“ и „Стентон градба“ од утре ќе ја почнат изградбата на делницата Гостивар – Букојчани, дознава А1он.

Овие три фирми подизведувачи се дел од најавените домашни компании на кои „Бехтел и Енка“ како изведувач им го има доверено извршувањето на дел од работите за почетокот на изградбата на најкомплицираната делница, која има и најмалку земјиште за експропријација.

„Еуровиа“ е фирмата која го доби тендерот за пренамена на спортскиот центар Борис Трајковски за конференцијата на министерскиот совет на ОБСЕ. Документите за тендерот се на разгледување во антикорупциската комисија и во јавното обвинителство за гонење на организиран криминал и корупција, откако излезе информација дека фирмата донирала на владејачката ДУИ, што пак беше демантирано од генералниот директор на компанијата, Елмедин Адеми.

Името на тетовската „АК Инвест“ може да се види во „топ 10“ граджни компании кои во последните 15 години добивале државни пари преку тендери, но во последните шест години, компанијата на Азби Ибрахими ја нема во компаниите кои добиле најмногу пари од државата, а во последните 12 месеци има три активни договори добиени преку тендери.

Третата фирма подизведувач, битолската „Стентон градба“ заедно со „Еуровиа“, ја нема во „топ 10“ фирми кои добивале државни пари од тендери. Во последните 12 месеци има добиено 21 тендер, а сега, како подизведувач, ќе работи на изградба на делницата Госитвар – Букојчани“. Оваа фирма е една од најзвучните во Битола, која низ годините, на документи има сменето тројца сопственици: Пецо Стојаноски, Благој Крстевски и моменталната сопственичка, Снежа Стојаноска.

Како што објави А1он, изградбата на делницата ќе почне утре, со минирање кај селото Дебреше. Пред стартот на изградбата пак, ниту обвинителството, ниту антикорупциската комисија не излегуваат со детали, дали ги разгледале сите 400 страници од договорот на државата со американско-турскиот конзорциум, иако истиот го добија пред четири месеци.