За нас леб од 33 денари, а за министрите плата од 1.800 евра, реагираат работниците по луксузирањето на функционерите

Културните работници веќе шести ден бараат прием кај министерот за финансии Фатмир Бесими. Тие и денеска излегоа на улица со цел власта да го одобри колективниот договор за вработените во министерството за Култура, Управата за културно наследство и Агенцијата за филм, со кој сите вработени по принципот на министерството за финансии, ќе добијат зголемена плата за 30%. На протестот од неодамна се придружија и претставници на синдикатот на културни работници, а вработените од министерството за Култура очекуваат да им се придружат и нивни колеги од другите министерства.

За граѓаните замрзнати макарони, ама затоа за функционерите морски плодови. Со новата методологија за плати политичарите ќе може да да бидат комотни и да си дозволат луксуз, реагираат административните работници кои веќе шести ден попусто бараат од владата слух за барањата. Министерот за финансии Фатмир Бесими и натаму не ги прима за да ги слушне нивните аргументи за зголемување на платите.

Според претседателот на Синдикатот на УПОЗ Трпе Деаноски, држава сме со највисока инфлација и со најниски плати. 

• Шести ден сме надвор на улица, шести ден бараме прием кај надлежните да се договориме кога ќе добиеме и ние она што ни следува. Бараме тоа што го добија колегите од едно Министерство и од Собранието. Ние добивме леб од 33 денари, а министрите плата од 1.800 евра со која ќе можат да си купат што сакаат, изјави Деаноски на денешниот протест.

Културните работници предупредија дека нема да се откажат од барањата. Поддршка ќе бараат и од други инстанци. Најавија дека ќе се обратат и до претставниците на меѓународната заедница при што ќе побараат нивна поддршка.

Протестот, што се организираше пред Владата, се одржува шести ден. Претседателот на Синдикалната организација на УПОЗ при Министерството за култура, Бранко Костовски за време на протестот денеска изјави дека платите на функционерите ќе бидат четири пати поголеми од платите на вработените во јавниот сектор.

• Упорно бараме некој од надлежните да ги сослуша нашите барања. Очигледно во државата се уште во сила онаа народната „кучињата лаат, караванот си врви“. Па така, веќе е извесно дека именуваните функционери ќе си добијат покачување од 78 проценти или илустративно, еден министер ќе добива плата од 1.800 евра, а еден вработен во државна администрација ќе добива просечна плата од 400 евра. Без дилема, за овие покачувања министерот за финансии сигурно ќе обезбеди финансиски средства и без протести. Ова секако нема да биде дисторзија во системот туку сосема оправдано покачување на платите на функционерите, затоа што тие тоа го заслужуваат, рече Костовски.

Како што посочи, доколку не добијат одговор деновиве, ќе се обратат и до други инстанци, до претставниците на меѓународната заедница, при што ќе побараат нивна поддршка.

• Нашиот концепт на мирни протести не допира до свеста на надлежните, што дополнително не мотивира да продолжиме со нашата борба и да ги поттикнеме и другите колеги да ни се приклучат во остварувањето на целта – достоинствена плата за вработените, додаде тој.

И покрај протестите, одговорот од надлежните е засега негативен. Од финансии уште во старт пораќаа дека се залагале за системско решение но за кога и како тоа ќе изгледа нема ништо поконкретно.

Борис Грујоски