Секојдневието преплавено со пандемија, сепак не ги предомислува граѓаните да ја дочекаат Новата Година надвор од Македонија. Најмногу аранжани се распродадени за Турција, но и за Грција и Бугарија. Но има и такви кои ќе заминат и подалеку во Европа, но и Русија. Цените разчлични, зависно од начинот на патување и хотелско сместување.

Истанбул, но и земјите од соседството се местата каде што поголем дел Македонците годинава ќе ја дочекаат новогодишната ноќ, велат за Алфа туристичките работници. Се нудат аранжмани за три и четири ноќевања за Турција со авионски и автобуски превоз. Цените почнуваат од 120 евра по лице за хотелско сместување со автобус и од 220 евра со авион. Дочекот на Новата година е на плоштад, а за прослава во рестораните и хотелите се доплаќа. Некои агенции нудат можност и за дочек на брод.

Од соседните држави има интерес за прослава на Новата година во Бугарија и Грција. Аранжманите за Софија се движат од 80 евра нагоре, а за Атина околу 100 евра со превоз и хотел. Пандемијата вели, Силвана Јовановска од Туристичка Агенција „Го Травел“ си го направила своето, и се надева дека оваа ќе биде последна година со рестрикции.

Од европските градови интересни се Виена и Милано. За Виена аранжманите со автобус се од 150 евра за две ноќевања и за Милано околу 200 евра за три ноќи.

Во сите градови дочекот на новогодишната ноќ  е на плоштадите, а дополнително се доплаќа доколку некој сака да ја помине во ресторан или хотел.

Од подалечните дестинации агенциите ги нудат и Москва и Санкт Петерсбург, каде што за 7 ноќевања со авион и хотел треба да се плати околу 800 евра по човек, а оние кои сакаат да го видат Дедо Мраз и да отпатуваат во Лапонија ќе треба да платат околу 1.500 евра за 5 ноќи со хотелско сместување.

Што се однесува до домашните сместувачки капацитети, најпосетен се очекува да биде Охрид, како и главниот град, Скопје.

Борис Грујоски

Advertisements