Економисти за Алфа: Ако бизнисот се занимава со национализам, ќе тонеме уште повеќе и уште посилно

Проблематични и скандалозни се изјавите на власта за двојазичност во бизнисот, и тоа во никој случај нема да овозможи подобрување на конкурентноста на фирмите, посебно не во време на пандемија, реагираат економистите.

Универзитетскиот професор Дарко Лазаров за Алфа вели дека политичарите не треба да се мешаат во економијата и да форсираат двојазичност во бизнисот, туку да ги засукаат ракавите и да работат. Ако се продолжи со базирање на економијата со национализам, додава Лазаров, ќе тонеме уште повеќе и уште посилно.

• Мерката на Владата, односно изјавите за двојазичност во приватниот сектор навистина се проблематични и скандалозни, кога се однесува на двојазичност во бизнисот, и тоа во никој случај нема да овозможи подобрување на конкурентноста на фирмите, посебно не во време на пандемија. Она што сакам да потенцирам, е дека најсериозен проблем е националната поделеност во бизнисот, зашто тој не познава јазици, туку квалитет, особено глобалниот бизнис. Треба да се фокусираме кон квалитетно образование, ние се занимаваме со некои примитивни и популистички мерки. Во 21 век во сите земји економиите ги базираат на знаење, само ние на популизам, што може сериозно да и наштетат и на економијата, и на Македонија, воопшто, вели за Алфа универзитетскиот професор, Дарко Лазаров.

Ние се занимаваме со популистички мерки, наместо да се занимаваме со суштински проблеми, смета Лазаров, и додава дека проблемот е немање на квалификуван кадар, зашто бизнисот не познава јазици, туку квалитет.

Дека станува збор за промовирање погрешен концепт критикуваат и бизнисмените. Од Конфедерацијата на работодавачи велат дека ваквите ставови на власта, дополнително ќе влијаат на поделби во бизнисот.

• Поразително е што и натаму дел од политичките субјекти не можат да се извлечат од дневната политика. Во едно слободно демократско општество ова што се случува е лошо. Така што ова што го слушаме наликува и на примитивен популизам. За еден бизнис концепт мислам дека не е потребен класичен популизам, ниту вакви идеи мерки или иницијативи кои не му помагаат ниту на бизнисот, ниту пак на општеството, ниту на концептот на граѓанско општество, предупредува претседателот на Конфедерацијата на работодавачи, Миле Бошков.

Од бизнис секторот реагираат и за форсирањето на двојазичност во приватните фирми. Последна во низата е изјавата на владиниот партнер Биљал Касами од „Беса“ кој отворено ги повика фирмите да воведат двојазичност, зашто како што вели, младите Албанци не го владееле македонскиот јазик.

Претходно и министерот за економија Крешник Бектеши порача дека ДУИ нема да отстапи од вработувањата на помалите етнички заедници, и дека тоа го имало во владината програма.

Борис Грујоски