Семејното насилство влијае и на порастот на меѓуврсничкото насилство. МВР обелодени фрапантни бројки – само од почетокот на годинава регистрирани се над 700 случаи на насилство во семејствата, наспроти 460 во истиот период лани што заначи дека за една година има зголемување за 67%. Загрижува и статистиката која покажува дека за 18% се зголемени и […]
Семејното насилство влијае и на порастот на меѓуврсничкото насилство. МВР обелодени фрапантни бројки – само од почетокот на годинава регистрирани се над 700 случаи на насилство во семејствата, наспроти 460 во истиот период лани што заначи дека за една година има зголемување за 67%. Загрижува и статистиката која покажува дека за 18% се зголемени и пријавите за врсничко насилство.
„ Податоците за врсничко насилство – оваа година регистрирани се 93 инциденти наспроти 81 минатата година. Во 64 училишта од кои 59 основни и 17 средни. Во однос на минатата година пријавите се зголемени за 18%, бројот на сторители за 16,5%, а кривичните дела за 10,6%.“ – вели министерот за внатрешни работи Панче Тошковски.
Институциите предупредуваат дека насилството не останува зад затворени врати во домот, туку неговите последици се почесто се пресликуваат и на улица и во училиштата. Затоа во соработка на надлежните институции, од следната седмица почнуваат со нова иницијатива за рано препознавање и превенција. Ќе стартува од образовниот систем, односно основните и средните училишта.
„Освен кампањскиот дел со порака преку медиумите, ќе имаме и теренски, уште поважен дел. Најпрво ќе спроведеме обуки за сите училишни психолози, педагози и социјални работници во основното образование, за јакнење на компетенциите за препознавање деца жртви на семејно насилство преку нивното однесување и преземање мерки за спречување и понатамошно ширење. Ќе организираме и дискусии со наставниците и семејствата на учениците за подигнување на свеста за овој проблем и за зајакнување на меѓусебната доверба и соработка, вклучително и соработката со институциите.“– вели министерката за образование и наука Весна Јаневска.
„Како министерство ја презедовме одговорноста да го предводиме процесот на воспитување на Националната работна група за превенција на насилството кај младите – првиот национален механизам кој системски и сеопфатно се занимава исклучиво за ова прашање. “– вели министерот за социјална политика, демографија и млади Фатмир Лимани.
Во соработка со комората на психолози дополнително е изготвен и протокол за постапување при сомнеж за насилство во училиштата. Експертите апелираат – најмладите кои се сведоци на тепање, викање и навреди може да го прифатат ова однесување како модел за решавање на нивните проблеми, но и да се повлечат и да попуштат во училиште.
