Во просториите на Универзитетот на Југоисточна Европа (УЈИЕ) во Скопје денеска ќе се одржи панел-дискусијата „Од диплома до вработување – како високото образование да одговори на барањата на економијата“. Панелот е во организација на Балканскиот институт за регионална соработка, во соработка со партнерските организации Форум за разумни политики и Институт за општествени и хуманистички науки […]
Во просториите на Универзитетот на Југоисточна Европа (УЈИЕ) во Скопје денеска ќе се одржи панел-дискусијата „Од диплома до вработување – како високото образование да одговори на барањата на економијата“.
Панелот е во организација на Балканскиот институт за регионална соработка, во соработка со партнерските организации Форум за разумни политики и Институт за општествени и хуманистички науки Скопје, во рамки на проектот „Застапување за инклузивен развој“, поддржан од Владата на Швајцарија преку програмата Цивика мобилитас.
На панел-дискусијата ќе се обратат заменик-министерот за образование и наука Дритон Сулејмани, Марјан Бојаџиев од Институтот за општествени и хуманистички науки – Скопје (ИОХН-С) и потпретседател на СКМ, проф. д-р Блерта Абази Чауши, декан на Факултетот за бизнис и економија при УЈИЕ и Марија Башеска од „Finance Think“. Воведни обраќања ќе имаат Гордан Георгиев од Форум за разумни политики (ФРП) и Џелал Незири од Балкански институт за регионална соработка (БИРС).
Како што посочуваат организаторите, панел-дискусијата ќе обедини претставници од бизнис-заедницата, академската сфера, граѓанскиот сектор и институциите, кои ќе разговараат за предизвиците и можностите за подобро усогласување на високото образование со потребите на пазарот на труд и економскиот развој.
-Темата е особено актуелна во контекст на потребата од подобро усогласување на образовните политики со потребите на стопанството и пазарот на труд во Северна Македонија. По воведните излагања ќе следува модерирана панел-дискусија и отворена дебата со присутните – соопштуваат организаторите на панел-дискусијата.
