Макрон не го менува ставот, Заев не се откажува од успех во предомислувањето на Франција за почеток на преговорите. По Самитот на НАТО во Лондон македонскиот премиер го намали интензитетот на оптимизам од „најголем“ во „реалистичен“ и порача дека добил добри вести за можно одблокирање на процесот во наредните месеци.

-Јас сум уверен дека следува убава одлука, убаво време за нас, не можам да споделам ништо затоа што како најголем оптимист, сега сум реалистичен оптимист. Работите се движат во позитивна насока, наше е да продолжиме да работиме, да продолжиме со реформи и се надевам дека вистинската одлука ќе биде донесена, односно историската грешка што ја направија ќе биде исправена, изјави премиерот Заев.

Макрон, од своја страна, воопшто не покажува промени во ставот околу преговорите со Македонија и Албанија при што одбива да ги одвои двете земји, сметајќи дека тоа би било „смртоносна“ грешка.

-Пред било кое ново отворање преговори многу експлицитно кажав дека сакам да се реформира процедурата, таа да биде реверзибилна и да овозможи диференцијација, да биде пополитичка и да биде придружена од фази на стратешки партнерства со соодветни инвестиции – рече Макрон.

Тој не демантира дека Балканот треба да биде дел од Европската Унија но појаснува дека досега била правена грешка кога се отворале преговорите за членство без јасни и прецизни механизми кога и дали тие некогаш би се затвориле. Од таа причина Макрон смета дека механизмот на „автоматско“ проширување кон западниот Балкан не е „здрав“  и повторно упати порака дека нема да прифати нова земја членка во ЕУ доколку претходно не се реформира процесот на консензуално одлучување и не се воведе одлучување преку квалификувано мнозинство. Конечно, тврди францускиот претседател, тие што сакаат проширување треба да одговорат на прашањата поврзани за внатрешните реформи на ЕУ, чија цел е да се поедностави процесот на одлучување и на функционирање на самата Унија.

Драган Милосављевиќ