Заев сака брзи избори во јуни, Мицкоски во првата половина од јули

Полека се приближуваат ставовите на политичките лидери околу датумот на предвремените парламентарни избори. По последните изјави на лидерите на двете најголеми политички партии се поизвесно е дека на избори ќе се оди летово, но не е договорено дали во јуни или крај на јули, односно дали ќе се  одржат брзите корона избори што ги бара лидерот на СДСМ Зоран Заев во јуни, или кон крајот на јули, како единствен можен и најран термин што го гледа лидерот на ВМРО-ДПМНЕ Христијан Мицковски.

Заев, во интервју за ТВ 24 најави дека на предстојната лидерска средба кај претседателот Стево Пендаровски, која веројатно ќе се одржи на 12 мај или следниот вторник ќе побара веднаш да се оди на избори ако се укинат или пак, олабават мерките за превенција од коронавирусот.

“Дефинитивно она што треба да преовлада е интересот на државата, дали ќе ја ставиме во ризик и да влезе во уставни проблеми од кои нема решение или навистина ќе бидеме одговорни и ќе го прифатиме првиот можен рок, а тоа сметам дека е средината на јуни“, рече во интервјуто Заев.

Уште една причина плус за побрзо одење на избори според Заев е и можниот нов бран на заболени од коронавирусот во септември.

Лидерот на ВМРО-ДПМНЕ Христијан Мицкоски, пак во интервју за истата телевизија, рече дека здравјето на граѓаните е пред се и дека најпрво треба да се создадат услови за фер и демократски избори, а не да се оди на Фејсбук или Твитер избори.

„Ако мене теоретски ме прашувате, како што го слушнав претседателот на ДИК му требале 50-тина дена и ако речеме дека сега претседателот ќе ја прекине вонредната состојба, теоретски зборуваме, тогаш некаде првата половина на јули е најбрзо што може да создадат услови за изборно соочување“, изјави Мицкоски.

Како и да е, дали и кога ќе има избори, ќе стане појасно веќе следната недела, по лидерската кај Пендаровски, кој веќе најави дека нема да ја продолжи вонредната состојба. Доколку летово имаме избори, тоа ќе бидат први во време на пандемија, па истите како што веќе најави министерот за здравство, Венко Филипче, ќе се одржат под посебни услови и протокол. Друга тема и подеднакво важна е и колку граѓани всушност ќе излезат на такви избори. Како што е познато, Заев брза да излезе на избори сега, затоа што нивното одлагање за наесен може да го чини многу имајќи в предвид дека тогаш вистински ќе се почувствуваат последиците од економскиот шок предизвикан од епидемијата со Корона.

Адријана Алексиеска