Заев најавува можно одложување на изборите – што го исплаши премиерот?

Можно ли е одложување на предвремените парламентарни избори кои се закажани за 12 април? Ваква дилема фрли последната изјава на премиерот Зоран Заев дека изборите би можеле да се одложат доколку стотината Закони кои се заглавени во Парламентот не го минат собранискиот филтер. Заев вели „не се заканувам, но ветувањата кон граѓаните мора да се исполнат“.

„Суштинските закони ако предизвикаат кочење на пензии, на социјалните трансфери, на покачувањето на платите, тогаш изборите може и да се одложат. Тоа денеска не го испраќам како закана. Одговорноста на секој пратеник, дали од власта или од опозицијата, е одговорност и на Владата и на локалната самоуправа и на сите кои плата земаме од граѓаните“, вели Заев.

За експертите, зад изјавата на премиерот се крие страв кај владејачката партија од анкетите кои не одат во нивна полза. Велат, ако изборите не се одржат на договорениот датум, револтот и кај опозицијата и кај граѓаните ќе биде голем. Сепак, дел од нив сметаат дека со ваквата реторика, првиот човек на Владата се обидува да изврши притисок врз работата на пратениците.

„Веројатно тоа е начин да им ја заврти ракатана пратениците во Собранието да побрзо се договорат иако не гледам точно што пролонгирањето на изборите би донело. Евентуално, можеби дека сепак ќе се чека позитивен сигнал од ЕК за отворање на преговорите кои јас веќе не знам дали е извесен или неизвесен“, вели универзитеткиот професор Ненад Марковиќ.

„Аргументацијата е многу слаба и тоа ќе и нанесе дополнителна штета на самата власт доколку се одложат изборите. Тоа може да повлече нова политичка криза и дека револтот тогаш ќе се излее на улиците и ќе имаме некаква реприза од она што се случуваше 2015 – 106 година“, вели аналитичарот Владимир Божиновски.

Ова не е прв пат владините функционери да споменуваат можно одложување на изборите, кои беа закажани на лидерска средба кај претседателот Пендаровски. Заев и минатиот месец зборуваше можно одложување на изборите поради доцнење со ратификацијата на протокот за НАТО од страна на Шпанија.

Биљана Божиновска