Врие во детската болница Козле – педијатрите бараат итно резрешување на директорот Андоновски

Заразени и здрави деца во иста амбуланта. Мобинг врз вработените. Врие во детската болница Козле. Триесетина педијатри се дигнаа на нозе – против директорот на болницата д-р Ангелчо Андоновски. Тврдат дека освен што се жртви на мобинг, директорот создава  раздор меѓу вработените. Велат, оставени сме сами на себе, немаме основни услови за работа,а најдраматично е што сме принудени да ги прегледуваме децата во црвената зона која е исклучиво наменета за пациенти позитивни на Ковид19,  значи, во истата амбуланта прегледуваме и деца кои не мора да значи дека имаат Ковид.

На сето тоа, униформите за работа многупати ги облекуваме и соблекуваме во сопствените автомобили, бидејќи наидувавме на заклучени ормани. Се соочуваме со промени без никакви најави, камери не снимаат 24/7- во вакви услови не можеме да работиме и многу од нас лекарите и медицинските сестри размислуваме за откази – доколку итно не се разреши директорот Андоновски, вака сведочи за Алфа еден од педијатрите за лошата ситуација во болницата.

Првиот човек на Козле, Андоновски не сака да коментира за обвинувањата на педијатрите. Одговорот ни посочи да го бараме од министерот за здравство.

За Филипче ситуацијата е позната, тој имал средба и со педијатрите и со директорот но веќе неколку месеци проблемот не е решен. Од МЗ за Алфа велат, дека работат на изнаоѓање на најдоброто решение.

“Токму поради фактот дека се наоѓаме во ек на пандемија а Детската болница Козле е еден од центрите за лекување на ковид пациентите, потребно е да се сослушаат сите страни и да се изнајде најдоброто решение  за функционирање на болниницата, пред се заради пациентиете кои се таму хоспитализирани, а  потоа и за целиот медицински персонал кој таму работи. И тоа е она што го правиме.” – велат од МЗ.

Лекарскиот колегиум при Институт за белодробни заболувања меѓудругото се пожали на слабата организација со Ковид состојбата во болницата обвинуваат дека Андоновски никогаш не воспоставил соодветна комуникација со медицинскиот персонал,не присуствувал на нивните стручни состаноци, и немал никаков увид во работењето.Од друга страна, педијатрите уверуваат дека Ковид воопшто не ги плаши – предупредуваат дека единствениот проблем со кој се соочуваат во болницата е само директорот Ангелчо Андоновски.

Ања Василева