Во Прилеп Свечена академија во чест на светите браќа Кирил и Методиј

Во Прилеп Свечена академија во чест на светите браќа Кирил и Методиј

           Просветителското дело на светите браќа Кирил и Методиј е епохално. Тие се најзаслужните рамноапостоли кои како најучени луѓе во 9 век го просветиле словенскиот род, почнувајќи со јазикот на Словените од Солун и солунско, а кој што речиси три века бил старо-словенскиот или старо-македонскиот, односно македонскиот јазик и кој всушност е основата на сите словенски јазици. Ова денеска го истакна митрополитот г.Петар на Свечена академија која се одржа во прилепската Црква „Св. Кирил и Методиј“ – „Параклис“, притоа додавајќи дека токму Кирил и Методиј биле оние кои што на православниот свет му ја предале и нашата православна вера, изворно и чисто, точно според Христовото учење. 

   „И тогаш, а и ден-денес ние се потпираме на нивното дело, бидејќи ги превеле Светите книги, Светото писмо на македонски, старо-макeдонски јазик и секако дека и богослужбените книги се преведени исто така, подоцна, од нивните свети ученици Климент и Наум Охридски – Чудотворци. Ние сме сведоци дека денес многу институции, просветни, образовни и воспитни  го носат нивното име, но не го проповедаат нивното дело онака како што тие го проповедале, туку само формално се споменува нивното име“ – кажа митрополитот г. Петар.

  Во рамките на денешното чествување беа вклучени и ученици од основните и средните училишта кои преку свои литературни и ликовни творби, а мотивирани од ликот и делото на светите Кирил и Методиј, учеа за значењето на сесловенската писменост, но и за православието.

   „Целта на овој проект е младината повторно да ја вратиме во црквите, односно да ги научиме дека црквите всушност не се само место за молитва, но се исто така и дом, како дом Божји, така и дом нивни, и место каде што можат да ги споделуваат своите знаења, место каде што можат да проучуваат нешто повеќе“, – истакна штец Андреј Иваноски.

  „Ликовната работилница претставува запознавање на децата со еден начин на сликање на икони кој се практикувал во византискиот период во нашата држава Македонија и воопшто“, – рече Александар Џинго, професор и ментор.  

  „Ние ги цртавме светите Кирил и Методиј, нивните дела кои ги правеле низ животот. Беше захтевно, но  со дружба, се постигнавме. Интересен проект, интересна Работилнца“ – вели Матеја Миленкоска, ученичка.

    Денешната Свечена академија беше во организација на Здржението „Креативни концепти“, а беше поддржана  и од Институтот за Старословенска култура.

                                                                                                           Каролина Дурло

КАТЕГОРИИ
Споделете ja веста

COMMENTS

Wordpress (0)
Disqus ( )