Хеликоптер, амбулантни и полициски возила – зборот што ветува „ќе” и стана омилен на власта

Зборот што ветува „ќе” и стана омилен на власта сега на само неколу месеци пред избори, а после дури седум години владеење. Одеднаш се појавуваат ветувања за се’ и сешто. Најдобар пример за безбројните ветувања е актуелниот министер за здравство. Најновото „ќе” на Фатмир Меџити е дека ќе се набавуваат 22 нови амбулантни возила за итната помош.

Во десет месеци владеење, ресорниот министер ветуваше помош на колабираниот сектор. За кој самиот признава дека здравствениот систем со кој раководи е нефункционален. Нови клинички центри и реновирање на старите, нов паркинг на клинички, ажурирана позитивна листа со нови лекови, вработувања на доктори и медицински сестри, ова беа главните ветувања на четвртиот министер за здравство во оваа влада, кој се претстави како супермен за македонското здравство. Но се остана на „ќе”. Тој денеска се правдаше дека немал магично стапче за да си го реалзиира дадениот збор.

“Ви кажав од првиот ден јас – Фатмир Меџити не се гледам како политичар, јас сум здравствен работник а тоа ќе или не е тоа се гледа со вакви конкретни работи, апаратура низ цело здравство, низ цела Македонија.Навистина многу сериозно настапивме од првиот ден со сите проекти кои ги раскинавме и што не се доградија по 30 години. Јас, немам магичен стап затоа ќе се избориме заедно со вас” изјави министерот Меџити.

Но, не е само кај Меџити, предизборното „ќе” актуелно е и кај министерот за внатрешни работни Оливер Спасовски. Дарежливоста на власта пред избори е неспорна, така што можниот кандидат за претседател на државата Спасовски најави добара вест за вработените.

13 милиони евра од буџетот на МВР се издвоени за униформи, техничка опрема и возила.

 “Единицата за обука и поддршка беше опремена со 6 возила и опрема за справување со нарушен јавен ред и мир. Со цел модернизација на хеликоптерската единица за полициски намени извршен е генерален сервис на летала, инсталирана е најнова дигитална комуникациска и навигациска опрема, ведро за гаснење на пожари, како и систем за гаснење на пожари. За потребите на специјалната антитерористичка единица „Тигар„ извршена е набавка на интервентни возила” – напиша министерот Оливер Спасовски.

Со ова, според Спасовски, целосно е задоволена полицијата за остварување на целта – безбедноста да биде на највисоко ниво во целата земја.

Пред неколку дена, Спасовски и Меџити се појавија да промовираат хеликоптер за итни медицински транспортирања, нешто што не би требало да биде причина за фалење, ако се знае дека земји во регионот одамна имаат ваков вид на пренесување на пациенти за итни потреби.

Ања Лукарова