Сопругот на актерката организатор, таа помагала во трговијата со колумбиски кокаин

Скопје, Канкун, Дубаи, Србија од јуни до декември,  преку високо заштитена комуникација се договарал транспортот на 700 килограми кокаин купен од Колумбија што требало да завршат на европскиот нарко пазар. Американската ДЕА со шпанската и македонската полиција ја расплете мрежата на нарко бизнисот на 6 члена група која требало да наплати 20 милиони евра од продажбата на дрогата. Актерката Силвија Стојановска е осомничена дека била помагач на нејзиниот сопруг Воислав Будисављевиќ, а според истрагата е мозокот на меѓународниот транспорт на дрога. Стојановска е осомничена дека работела по ингеренции на нејзиниот сопруг, кој имал забрана за патување во земјите на ЕУ. Како дел од мрежата бил и братот на Будисављевиќ, резидент на Белгија.

– Откако биле договорени сите детали, на почетокот на декември С.С. по инструкции на нејзиниот партнер В.Б. резервирала апартман во Мадрид на име на неговиот брат и истиот го платила со сопствена кредитна картичка. С.С. во октомври отпатувала во Мадрид преку Софија, за во име на нејзиниот сопруг од непознат шпански државјанин да подигне 10.000 евра, најверојатно за криминални активности на оваа мрежа – изјави Оливер Спасовски министер за внатрешен работи.

За пратката прекуокеански да стигне од Колумбија до Шпанија на извесен „капетан на борд“ групата му платила 850.000 евра. Дрогата откако стигнала во Мадрид била складирана во магацин се додека да се најдат купувачи. Братот на Будисављевиќ, шпанската полиција го уапсила дента кога кокаинот го натовариле во комби за да ја достават до следниот купувач. Воислав  и Стојановска се уапсени во Скопје.

-Првоосомничениот веќе има пресуда за сторено исто такво кривично дело и затоа за него е побарана мерка притвор, додека осомничената е прв пат сторител на кривично дело објасни  Маја Коневска обвинител за гонење организиран криминал и корупција

Покрај братот на Будисављевиќ во Шпанија се уапсени уште две лица. Во криминалниот ланец недостасуваат уште двајца, еден турски и еден грчки државјанин.

Катерина Гетева