Рускоска ќе стане новата Јанева- бомбите и обвинителите од СЈО заминуваат во нејзиното Обвинителство

Бомбите на Заев и обвинителите на Јанева заминуваат кај Вилма Рускоска во Обвинителството за гонење организиран криминал и корупција. Ова е предвидено во предлог законот на Министерството за правда. Практично, обвинителството на Рускоска ќе биде новото СЈО, бидејќи не е предвидено формирање на претходно од власта бараното Обвинителство за гонење висока корупција.

-Основното јавно обвинителство за гонење на организиран криминал и корупција ги презема надлежностите од Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, согласно Законот за јавно обвинителство за гонење на кривични дела поврзани и кои произлегуваат од содржината на незаконското следење на комуникациите, се вели во член 108 став 3 од Предлог законот за Јавно обвинителство.

Наместо обвинетата во „Рекет“ Катица Јанева, нов шеф на поранешните специјални обвинители ќе биде Рускоска. Во предлог законот предвидено е нивен трансфер во Обвинителството за гонење на организиран криминал и корупција. Со ова практично се прифаќа барањето Рускоска да биде „главна“, нешто, со што не се согласуваше опозицијата.

-Јавните обвинители во Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, кои постапувале по предметите од надлежност на ова јавно обвинителство, продолжуваат да постапуваат по тие предмети кои се предадени на јавното обвинителство на Република Северна Македонија, се вели во член 109 став 4 од Предлог законот за Јавно обвинителство.

Инаку, СЈО се уште само официјално е живо, а доколку биде прифатен амандманот со кој парите предвидени за ова Обвинителство се пренаменат за изборите закажани во април, тогаш и официјално ќе згасне. Вработените во СЈО бараат повлекување на овој амандман и велат дека со загриженост и неверување ја примиле ваквата вест.

Матеја Петровски