Ослободени членовите на екипажот на грчкиот танкер кои беа киднапирани во Того

Тројцата членови на екипажот на грчкиот танкер кои беа киднапирани на почетокот на ноември годинава во Того се ослободени, додека пак четвртото лице починало, соопштуваат од компанијата во чија сопственост е танкерот „Елка Аристотелис” што беше мета на вооружен напад, јави дописничката на МИА од Атина.

Од компанијата денеска соопштија дека ослободените државјани на Грција, Филипини и Грузија се безбедни и во добра состојба, им бил извршен лекарски преглед и им се предадени на локалните власти за да се вратат во нивните земји, а биле контактирани и нивните семејства.

Четвртиот член на екипажот што беше киднапиран и е филипински државјанин, починал, поради болест.

На 4 ноември 2019, како што тогаш објави МИА, беше извршен вооружен напад врз танкерот под грчко знаме “Елка Аристотелис” што бил закотвен во главниот град на Того, Ломе и беа киднапирани четири од 24 членови на екипажот.