Нов конкурс за попишувачи со старите проблеми и дилеми

Конечно објавен долго очекуваниот конкурс за попишувачи за престојното пребројување на населението во септември. Конкурост е објавен на веб страницата на државниот завод за статистика и тој ќе трае дури 15 дена што не беше случај за минатите конкурси кои пропаднаа, оти пописот се одложи, но и не се пријавија доволен број на попишувачи.

„Ги повикуваме сите заинтересирани, како и сите оние кои се пријавија на првиот повик во март годинава, да ја пополнат апликацијата и да станат дел од големиот пописен тим кој во септември ќе го спроведе долгоочекуваниот Попис на населението, домаќинствата и становите во Македонија, велат од Државен завод за статистика.

Се уште останува отоврено прашањето што доколку и на овој конкурс како и на претходните не се пријават доволно попишувачи? Кој е планот Б на државниот завод за статистика, особено зошто времето е многу кратко и речиси невозможно за да се распише уште еден конкурс без да се одложи пописот. Алфа го побара директорот на статистика да објасни, но тој не одговори на нашите повици.

Уште нема ни конкретен одговор што ќе се случува со имунизацијата на попишувачите, доколку се пријават доволно. Особено оти на конкурост што е распишан, вакцинацијата не е задолжителна за тие кои ќе сакаат да бидат попишувачи. Од државниот завод за статистика се правдаат тие не можеле никого на сила да натераат да се вакцинира, но попишувачите кои ќе сакаат да се вакцинираат, ќе им бидат овозможени вакцини. Но и за нив времето е кратко оти треба да се примат две дози на вакцини, а обуките на попишувачите почнуваат по 5 август.

А токму имунизацијата беше една од точките на лидерската средба кога се одложи пописот, за кои зборуваа Мицкоски и Заев. ВМРО-ДПМНЕ тогаш бараше одложување на пописот со цел да се остави доволно време до есен да се имунизираат сите попишувачи за процесот на пребројување на населението да биде побезбеден.