Мицкоски: Заев е директна закана за правдата

Власта нема интерес за нов закон за обвинителство, бидејќи сакаат нивниот криминал да мине неказнето, предупредува лидерoт на опозицијата Христијан Мицкоски. Според него, тоа е причината зошто после пет месеци станува соврешно јасно зошто премиерот Заев нема интерес да донесе нов закон за јавно обвинителство. Како пример Мицкоски го спомена случајот „Рекет“, за кој одамна постојат сомнежи за инволвираност и на лица од власта. Според него никој во државава не верува дека во овој случај се вмешани само три лица.

“Тие одат по принципот сите се виновни, само Зоран Заев е чесниот, па колку и тоа да звучи парадоксално сакаат преку скапите кампањи да не убедуваат дека тоа е таа вистинска вистина. Практично им требаше ова обвинителство и не сакаа закон за тоа обвинителство да се смени, за да имаме неказнет криминал, а јас го говорев ова тогаш и го повторувам сега-власта нема интерес за закон за обвинителство, затоа што сите овие афери кои се случуваат во низа сакаат да останат несанкционирани” –  изјави Мицкоски.

Но не само за Рекет, според Мицкоски власта спроведува сценарио за блокада на истраги и за десетина други афери. Рекет 2, Инсулин, Вирус, случајот Те-То со индиции за криминал тежок 200 милиони евра се само дел од случаите. Тој ги спомена и исказите на сега веќе осудениот во „Рекет“ Зоки Кичеец, каде наводно е прецизно посочено дека Боки 13 станал посебно нервозен откако од Владата добил информација дека е пријавен од страна на Орце Камчев. Според претседателот на ВМРО-ДПМНЕ ова потврдува дека лица од врвот на власта биле во тесна комуникација со првообвинетиот Јовановски.

Ања Василева