Локвенец не се откажува од платата во време на борба со коронавирусот – „Кој ќе ми ги храни децата“ ?

Ќе го следи ли Македонија примерот на држави од соседството каде се носат одлуки за намалување на платите на функционерите и овие средства се пренаменуваат за борба против корона вирусот? Повеќе индивидуални иницијативи веќе се појавија на социјалните мрежи. Граѓаните ги повикуваат функционерите да се откажат од платите и да ги донираат на медицинскиот персонал. Особено се повикуваат пратениците кои во моментов не заседаваат. Собранието е распуштено, а поради новата состојба не можат да се спроведат избори.

Дел од нашите пратеници не се согласуваат со ваквите предлози. Велат дека има друг начин како парламентарците да се стават во функција на државата. Други пак велат дека поддржуваат се што е во рамки на уставот и дека од хуманитарните потези не треба да се прави пи-ар.

– Имам три сина. Ако вие ми ги храните ќе се откажам од платата. Пратениците треба да се состанат и да бидат во функција на државата во вонредна состојба, изјави за Алфа пратеникот Хари Локвенец

– Се што е уставно поддржувам. Оној кој помага не треба да се фали со тоа, вели пратеникот Димитар Стевананџија

До сега министерката за финансии Ангеловска се откажа од платата додека на сила се владините перки против ширење корона вирус.

Алфа испрати прашање до владата дали тоа ќе го направат и други министри. Одлуката на Ангеловска била индивидуална

-Одлуката на министерката за финансии е доброволна. Владата до сега нема донесено таков заклучок. Доколку има таква одлука и од другите функционери ќе бидете навремено информирани, одговорија од владата .

Колку за споредба во Албанија платите на пратениците и министрите ќе бидат преполовени. Тое е една од мерките на владиниот кабинет за справување со епидемијата на ковид-19. Мерката ја соопшти премиерот Еди Рама. Претседателот Илир Мета самоволно се откажа од половина од платата.

КАТЕГОРИИ
Споделете ja веста