Изборниот процес да продолжи по уредба на Владата е спорен и за Пендаровски

Брзи избори во јуни или јули по желба на СДСМ, се спорни и за шефот на државата Стево Пендаровски. Тие бараа изборниот процес да продолжи со завршување на вонредната состојба, но и Пендаровски на линија како и експертите, што се однесува до уредбата на владата, за продолжување на изборните дејствија. Според него постојат правни размислувања дека уредбите важат додека има вонредната состојба, потоа мора да ги потврди парламентот. Според Пендаровски, Уредбите на Владата имаат сила на закон, но Владата има законодавна моќ само додека има вонредна состојба.

– Не би сакал да им наметнувам нови задачи од областа на правото на овие што се правници од власта и од опозицијата, меѓутоа, постои размислување дека уредбите со законска сила важат додека важи вонредната состојба. Потоа, за да евентуално продолжат да важат треба Собранието да ги потврди. Ако ги потврди ќе продолжат да важат, ако не, нема да важат. Тоа е едно од правните мислења кои ми го кажуваат, ми го советуваат тие што мене ме советуваат во правната сфера. Не велам дека тоа е дефинитивна вистина, меѓутоа, само сакам да го кажам тоа – вели претседателот Пендаровски.

Претседателот на Собранието Талат Џафери одбива да го свика парламентот, бидејќи тој веќе е распуштен, ова беше и причината Пендаровски на 16 април да прогласи вонредна состојба по втор пат, што беше спорно за универзитетската правна фела, бидејќи го обвинија дека го рпекришил Уставот. Сега, за нови 30 дена вонредна состојба претседателот вели дека ќе размисли два пати.

– Не сум сигурен дека ако трендовите во однос на Ковид се стабилизираат и генерално попуштаат и според првичните проценки и мерките за ограничување на движење, за реотворање постепено на бизнисите, не сум сигурен дека и во таква ситуација ќе решам – еве ви нови 30 дена, еве ви нови 30 дена и не се секирајте, јас постојано ќе давам нови 30 дена, бидејќи вторите 30 дена беа дадени или утврдени затоа што мораше, истакна Пендаровски.

Вонредната состојба истекува на 16 мај, Пендаровски најави нова лидерска средба за 10 – тина дена, откако претходно на тоа иниситираше лидерот на ВМРО ДПМНЕ Христијан Мицкоски.

Катерина Гетева