И младите ќе се вклучат во борбата со корупцијата

Во борбата против корупцијата во земјава се вклучуваат и младите.  За да можат да препознаат корупција и да делуваат соодветно ќе можат да поминат обуки наменети за средношколците и младите политички лидери. Поддршката за оваа цел доаѓа и од амбасадата на САД.  За жал, иако довербата во судството е одвај 2 проценти, младата енергија може да придонесе да се промени оваа – за сега -катастрофална слика.

Мислам дека не е само правосудството единствениот орган каде што може да се пријави корупција. Целта на овој проект е токму да ги разгледаме сите механизми коишто стојат на располагање на младите. Вчера имавме работилница со средношколци и бевме пријатно изненадени за нивото на кое младите ја чувствуваат корупцијата и колку се свесни за значењето каков импакт има корупцијата врз нивните животи, така што во оваа серија на работилници ќе работиме и на тоа да се зајакнат механизмите на коишто може да се пријави корупцијата и се разбира, отворени сме секогаш за критика“, вели Ленче Ристовска, обвинителката за врски со Европравда

Судијата Бетим Јахја очекува овие обуки да помогнат во борбата против корупцијата.

„ Целта е да се изгради поздраво општество каде што ќе владее правото, правдата и правичноста и корупцијата ќе се потисне што е можно повеќе“, рече судијата Бетим Јахја.

Македонија редовно е критикувана во сите извештаи на Европската комисија за присуство на висока корупција и распаднат судски систем во кој граѓаните не веруваат. Меѓународната заедница најмногу забележи на измените на Кривичниот законик коишто придонесоа застарување на дела од висок профил на корупција.

Имено, Министерството за правда од неодамна почна со јавни дебати на кои ќе треба да се дефинираат реформите во правосудниот систем.