Ѓорѓиевски демантира дека по пожарот во Расадник ќе се градат згради

Додека јас сум градоначалник во Расадник нема да се градат згради. Ова го вели градоначалникот на Кисела Вода, Орце Ѓорѓиевски кој ги негираше сите шпекулации и коментари кои вчера се појавија на социјалните мрежи дека во овој дел од градот намерно бил подметнат пожар за да се изградат станбени објекти.

Ѓорѓиевски вели дека ваквите шпекулации се смешни затоа што тој е оној кој уште на почетокот спречил да се реализира деталниот урбанистички план на поранешната влада на СДСМ и ДУИ со кој се предвидуваше да се изградат 99 згради.

„Уште да биде потрагично оние кои што сакаат тој дуп да го донесат гледам дека се активирани на ова прашање, и пишуваат дека се палело за да се гради. Таму нема детален урбанистички план. Еве апелирам до тие душегрижници слободно можат некоја полјоделска, некој полјоделски производ да садат таму, така да таму е земјоделско земјиште, таму нема простор за градба. Јас одговорно тврдам. Јас сум тој кој што спречи изградба на 99 згради таму заедно со граѓаните“, вели градоначалникот на Кисела Вода Орце Ѓорѓиевски.

Ѓорѓиевски вели дека во иднина ќе се заложи да се поништи штетниот ДУП за Расадник и да се обајви меѓународен конкурст и општината транспарентно да го води процесот. Вели дека ниту една било каква непогода нема да може да влијае против неговата намера граѓаните заедно со експертите да го креираат и изберат новиот ДУП.

Ако во иднина нешто се гради на овој простор тоа ќе бидат градинки, училишта, трговски центар или пак црква, вели Ѓорѓиевски. Инаку Голем пожар синоќа го зафати расадникот во Кисела Вода. Како што информираше директорот на Центарот за управување со кризи Стојанче Ангелов, овој невообичаен шумски пожар среде град греа ореови дрвја, грмушки и трева. За среќа немаше настаната никаква материјална штета и немаше човечки жртви.

Љубиша Владимиров