Глас за Македонија нема да учествува на предвремените локални корона избори во Штип

“Како општествено одговорна партија, иако сме јавно предизвикувани да учествуваме на изборите, нашиот единствен одговор е: НЕ! Сметаме дека на уште едни “корона“ избори не треба да се настапува, иако имаме одличен кандидат. Тие нема да бидат ниту фер, ниту демократски, а најмалку безбедни. И еден изгубен човечки живот поради оваа сложена операција, ќе биде доволна причина да не влегуваме во опасна авантура.”- стои во соопштениенто на политичката партија Глас за Македонија.

Ако во Јули 2020 се велеше дека мора да се одржат предвремените парламентарни избори поради доаѓањето на вториот жесток бран на пандемијата, какво е оправдувањето токму среде тој бран да се одржуваат било какви избори?! – прашуваат од Глас за Македонија

Од таму потенцираат дека однесувањето на премиерот Заев, кој “мораше“ токму актуелен градоначалник да назначи за министер, го сметаме не само за неодговорно, туку и за директно загрозување на јавната безбедност, притоа додавајќи дека Македонија многу лошо се справува со епидемијата.

Бројките на заразени, а посебно смртноста се меѓу највисоките во Европа. Болничките капацитети се полни, здравствените работници се на работ на издржливост. Влегуваме во нова, можеби најопасна фаза на пандемијата кога во целиот свет се воведува целосно или делумно затворање на цели региони, кога секој доктор и медицинска сестра се ставаат во функција на здравството. А кај нас се најавени избори, кои не мораа и не смеат да се случат.“ – заклучуваат од партијата.

Тие го повикуваат Министерот за здравство, господинот Филипче и Комисијата за заразни болести да не потклекнуваат по втор пат пред политиката и да не дадат виза за оваа масовна операција, во спротивно и нив ќе ги сметаат за соучесници во ширењето на заразата.

„Заради сето погоре кажано, Глас за Македонија никако нема да учествува на ниту едни избори кои се среде ваква опасна пандемија. Предвремени или редовни. Здравјето на граѓаните пред се и над се!“ – потенцираат од Глас за Македонија.