Бројките на починати растат, комисијата допрва ќе анализира – Македонија лидер во регионот по смртност

Високите бројки на починати и заразени со корона вирус во земјава станаа секојдневие а надлежните допрва ќе утврдуваат на што се должи тоа. Само во последните седум дена, битката ја загубија 41 пациент, а меѓу нив за жал имаше и млади лица. Денеска шест пациенти им подлегнаа на симптомите на Ковид 19 – министерот за здравство Венко Филипче признава дека бројките се загрижувачи но според него, не грешиме никаде.

Земјава урива црни рекорди – во регионот Македонија е на неславното прво место по бројот на починати на милион жители, и на 21 место од 200 земји во светот кои се соочуваат со пандемијата.  Светскиот просек на пациенти кои подлегнаа на симптомите на Ковид 19 е 120 починати на милион жители, а земјава со 327 починати, го надминува за 2,6 пати.

Анализите на епидемиолошката состојба во земјава се во тек – првиот човек на здравството најави дека најдоцна до понеделник ќе се знаат причините за повторниот пораст на заразени и починати. Тој не ја исклучува исклучува можноста за преземање порадикални чекори и враќање на рестриктивните мерки.

Комисијата за заразни болести викендов ќе ја разгледува и можноста за целодневна настава во училиштата, а одлуката за градинките останува на сила, оти како што вели Министерот, веќе се развиени алгоритми како ќе се постапува доколку дете се дијагностицира со Ковид 19.

Адријана Алексиеска