Црн рекорд во Македонија- Регистрирани се 5 нови починати и дури 53 новозаболени со Корона

Рекорден број на заразени и починати од корона вирус во земјава – за само 24 часа во Македонија дијагностицирани биле 53 новозаболени од Ковид 19, а починале пет пациенти.

Од нив тројца се нови, а двајца починале во текот на неделава. На Клиниката за инфективни болести во последното деноноќие починале двајца пациенти, жена од струшко Лабуништа на возраст од 71 година и 77-годишен пациент од Куманово.

Меѓу починатите имало и еден странски државјанин кој живеел во Скопје.

„Пациентот од Куманово кој почина на 2 Април на Инфективната Клиника во Скопје, а чиј тест позитивен на Ковид 19 беше потврден вчера попладне, е евидентиран во денешната статистика на починати лица“.

Меѓу починатите за кои денес информираа надлежните евидентиран е и 78-годишниот маж од Велес кој почина пред неколку дена, откако беше вратен од велешката болница.

Најголем број од новодијагностицираните се од Струга – 14, 13 нови пациенти има во Скопје, 8 во Куманово, шест во Кочани, 5 во Штип, по двајца во Прилеп, Тетово и Гостивар и еден во Велес.

Со последните потврдени случаи, бројот на заболени од Ковид 19 се искачи на 483.