Јовески бара од јавните обвинители построги санкции за недозволено поседување и трговија со оружје

По случувањата во Србија се јави и јавниот обвинител Љубомир Јовески. Им пишал на обвинителите порака и побарал построги санкции за недозволено поседување и трговија со оружје.

„Трагедиите со кои се соочува српското општество се аларм и за нас како орган на кривичниот прогон и не принудуваат како институции да се мобилизираме за што поефикасна контрола на оружјето и во нашата земја“, смета јовески, кој бара од јавните обвинители да делуваат за зајакнување на казнената политика за недозволено држење оружје и муниција.

„Барам од сите јавни обвинители во државава, при постапувањето, да инсистираат на построги кривични санкции за кривичното дело – недозволено изработување, држење и тргување со оружје или распрскувачки материи. Заострувањето на казнената политика мора да се одразува во постапувањето најпрвин на основните јавни обвинителства, кои треба да внимаваат висината на санкцијата за вакви кривични дела да се движи во рамките на законски определниот распон без можност за алтернативна мерка. Покрај ова, вишите јавни обвинителства, во случаите на определена блага санкција со првостепените пресуди, мора да се обидуваат преку постапките во втор степен да издејствуваат повисоки казни“, стои во пораката на Јовески до јавните обвинители.

Ако се имаат предвид огромните штетни последици кои што можат да бидат предизвикани од недозволеното држење на оружје, за сторителите на ваквите кривични дела не треба да има ублажување на санкциите. Оружјето е средство за извршување и на многу други кривични дела и неговата употреба надвор од законските рамки не смее да се толерира, им порача јовески на обвинителите.

Исто така, тој нагласи дека трендот на намалување на возрасната граница на сторители на тешки кривични дела го забележуваме и во постапувањето во нашата земја. Тоа е нешто што загрижува и за што во најскоро време треба да бидат преземени конкретни превентивни активности од сите надлежни институции.