Собранието заглавено, премиерот со книга во рака и слушалки на уши се бори за нови министри

Шест дена расправата во Собранието за реконструкција на Владата на Димитар Ковачевски е заглавена на втората точка. Случувањата на дело ја покажуваат нефункционалноста на Законодавниот дом. Немаме министри за правда, здравство, информатичко опшстество, и животна средина, но гласањето на новите не е ниту на повидок. Дека дебатата не е конструктива, и по малку досадна веројатно може да се суди и по односот на првиот човек на Владата, кој со слушалки на ушите и книга во рацете се трудеше побрзо му помине времето. ВМРО-ДПМНЕ предупредува, дека во време кога системот во здравството не функционира, ние немаме министри во клучните ресори за овој проблем – министерството за здравство и она за информатичко општество. Поразително, според опозицијата е што министрите не се разрешуваат поради вакви проблеми, туку поради менување партиски дресови.

Главна тема во земјава е здравството, а во здравство имаме хакиран систем. Се разрешува овој министер за здравство, а сега дебатираме за разрешување на министерот за информациско општество и администрација. Овој министер е задолжен за интегрирана информатичка мрежа и безбедност на податоците. А тоа го немаме. Но, ниту министерот за здравство, ниту министерот за информациско општество не  се разрешуваат поради овие скандали, туку поради менување партиски дресови, рече Владо Мисајловски, пратеник од ВМРО-ДПМНЕ на денешната собраниска расправа за разрешување на министри во Владата.

Владејачката СДСМ со свои обвинувања. Од собраниската говорница наместо да се зборува за точката на дневен ред, се зборуваше за минатото. Колку млади луѓе ја напуштија државата во време на владеењето на ВМРО-ДПМНЕ.

„МВР ја претворивте во МВРО-ВМРО, прислушувавте над 20.000 граѓани, студентите ги тепавте по читални, ги заплашувавте и им се заканувавте на наставниците, а граѓаните ги искрадовте. Вие подобро и повеќе се грижевте за спомениците, отколку за граѓаните, трошевте на чоколадо, а не за леб за граѓаните“ порача Лазаревска.

Освен за разрешувањата на Беким Сали и Адмирим Алити, на 104тата седница треба да се расправа и за разрешувањето на министерот без ресор задолжен за дијаспора, но и назначувањата на Фатмир Меџити за министер за здравство, Азир Алиу за министер за информатичко општество, Кренар Лога за министер за правда и Каја Шукова за министер за животна средина. Седницата може да трае и повеќе од две-три недели, со оглед на тоа што се работи за поединечна расправа, а за збор се пријавуваат речиси сите пратеници.

Адријана Алексиеска