Месото само делумно поевтини, фирмите што поставиле фотоволтаици извисија за поевтина струја

Недоволно поевтинување на месото на стартот на декември. Цените на пилешкото и свинското биле намалени за 5%, а кај телешкото нема никакви промени – велат од Групацијата за производство и преработка на месо. Субвенционирана струја за декември не добија сите месни капацитети. Оние со фотоволтаици, имале системски проблем. За да не добиваат од една страна евтина струја, а од друга да заработуваат од продажба на вишоците сега треба да чекаат ЕСМ и ЕВН да предложат решение. Подготвени биле да ги предаваат вишоците гратис, само за да можат да добијат поевтина струја и да ги поевтинат производите.

„ Од денеска имаме намалување во просек за 5 отсто, пред се кај домашното свежо свинско месо, но сега се усложнија работите и не знаеме до кога тоа ќе трае. Во иднина намалувањето на пилешкото ќе биде и над 5 отсто поевтино, но телешкото засега не“ – вели Гоце Трајчев од Групацијата за месо.

За да можат повеќе да ги поевтинат месото и месните преработки, производителите бараат да се усвои антикризна мерка за ослободување од царина за увоз на замрзнато свинско месо. Мерката која беше на сила 4 години, престана да важи летово. Компаниите сега треба да плаќаат од 19 до 35% на увезената суровина. Тоа ги прави неконкурентни на домашниот пазар, бидејќи готовите производи од увоз влегуваат без царини. Дополнително, Групацијата за месо почна кампања за купување домашни производи.

Тања Попова

КАТЕГОРИИ
Споделете ja веста