„Њујорк тајмс“: Дојче банк под истрага во САД поради трансакции за перење пари

Американските власти вршат истрага во германската Дојче банк заради сомневање за криминално неисполнување на мерките за спречување на перење пари,објави Њујорк тајмс.

Истрагата е фокусирана на тоа како банката продолжила со трансакции за кои вработени во неа ги идентификувале како сомнителни.

Според написот кој се потпира на изјави од седум неименувани извори, некои од трансакциите се поврзани со Џаред Кушнер, зет и советник на американскиот претседател Доналд Трамп.

Тами Мекфадден, поранешен вработен во Дојче банк, минатиот месец изјави за весникот дека пријавила некои трансакции поврзани со компанијата на Кушнер како сомнителни. Но, нејзините претпоставени не ги пренеле информациите во американското Министерство за финансии.

Портпаролот на банката одби да даде коментар за тврдењата на весникот.