Хуманите луѓе и фирми собраа 40 илјади евра за Кико, каде е државата?

Додека младиот Кристијан Коцев се бори за живот и моли за помош – државата не помрдна со прст. Кико има ретка болест а за неговото лекување се потребни над 50 илјади евра за да отпатува на лекување во Турција.

Голема надеж дека ќе стигне до потребната сума е тоа што за само три дена преку донации се собрани околу 40.000 евра од граѓани и компании.

Но каде се здравствените власти и фондот за здравствено осигурување? Зошто досега не понудија каква било помош – од ресорното министерство не добивме одговор. А од ФЗОМ велат дека немало барање за лекување во странство.

“За осигуреникот Кристијан Коцев нема поднесено барање за лекување во странство во ФЗОРСМ.Постапката за упатување на лекување во странство се поведува по барање на осигуреното лице” – велат за Алфа од ФЗОМ.

Кристијан има ретка дијагноза и секојдневно се влошува неговата здравствена состојбата, поради што итно е потребно да се собере потребната сума.

Сите кои што сакаат да помогнат може да донираат на броевите:

А1: 143 471, Телеком: 143 130.

ТРАНСАКЦИСКА СМЕТКА: 200004087594930 СТОПАНСКА БАНКА АД Скопје, Катерина Коцева.

Дека државата ги заборава пацинетите со ретки болести говорат и фактите. Во последниве неколку години починаа неколкумина луѓе со ретки дијагнози.

Благојче Илиевски, кој речиси две години добиваше уверувања дека ќе го добие лекот за цистична фиброза – трикафта, ја изгуби битката со болеста.

И Јана Арсовска со редок тип на рак, не издржа чекајќи ФЗОМ да и одобри парични средства за лекување во странство.

Тамара од Велес, девојчето кое имаше искривен ‘рбет почина чекајќи државата да и одобри операција во странство.

Во Македонија има околу 2.000 пациенти со ретки болести со приближно 300 различни дијагнози. Секоја година бројот на новодијагностицирани се зголемува, од кои најголем процент се деца.

Ања Лукарова