Судот безмилосен и за притворите: Сите 16 осудени заминуваат во Шутка

Судечкиот совет предводен од судијката Добрила Кацарска го прифати барањето на Обвинителството за обезбедување притвор на обвинетите во настаните од 27 април во Собранието кои денеска добија вкупно 211 години затвор.

Обвинетите, со исклучок на неколкумина, претходно побараа да бидат ослободени од притвор до правосилноста на пресудата.

Меѓу нив имаше и луѓе кои и досега биле во куќен притвор или се бранеле од слобода и притоа се придржуваа до сите елементи од мерките за претпазливост кои им беа одредени. Осудените го молеа судот да им дозволи до правосилноста на пресудата да бидат со своите семејства, со своите деца, неколкумина кои понудиле гаранции со недвижен имот повикуваа на логиката дека никогаш не би побегнале па да ги остават на улица своите најблиски или да ги напуштат своите фамилии.

За обвинетиот Абдулфета Алими, бранителот Дончо Наков посочи дека „најоштетениот од 27-ми април, Зијадин Села, дал свој имот како гаранција за човекот кој му го спасил животот“. Ништо од ова не вредеше во одлуката на судечкиот совет на чело со Добрила Кацарска, па сите осудени добија притвор и се пренесени во притворските оделенија во затворот во Шуто Оризари.

Шеснаесет од седумнаесетте обвинетите денеска беа осудени на казни затвор во висина од 7 до 18 години, додека ослободен од обвинение е Игор Дурловски.

Во изјава за медиумите обвинителката Ивана Трајковска истакна дека правдата е задоволена во однос на денешната пресуда и посочи дека откако Обвинителството ќе ја добие пресудата на писмено ќе донесе одлука дали ќе поднесува жалба за пресудите.

Митко Чавков доби најголема казна од 18 години, Митко Пешов 15 години, Душко Лазаров 15 години, Горан Ѓошевски – Леви – 15 години, Оливер Поповски – 13 години, Оливер Радулов 10 години, Мунир Пепиќ – 15 години, Абдулфета Алими – седум години, Младен Додевски – 12 години, Јане Ченто 15 години, Горанче Ангеловски – 12 години, Игор Југ – 12, Влатко Трајковски – 15 години, Вилијам Михајловски – 14 години, Никола Митровски – Кољо -15 години и Александар Василевски Нинџа – осум години,

Осудени се за „терористичко загрозување на уставниот поредок и безбедноста“. Судскиот процес почна во август минатата година и е еден од најголемите во поновата македонска историја. На почетокот процесот почна против 33 обвинети, кои беа извршители на упадот во Парламентот и на нападите врз пратениците на актуелната власт. Но, по донесувањето на Законот за амнестија помилувани беа 15 лица.