Се разговара за размена на споменици: Дали Ципрас од Скопје ќе замине „на коњ“?

Дали во рамките на посетата на Македонија, грчкиот премиер Алексис Ципрас покрај другата агенда ќе има за цел и да ја договори размената на споменици помеѓу двете земји, за која се шпекулираше пред извесно време?

Ова е прашањето кое се поставува, откако премиерот на Република Македонија Зоран Заев во разговор за Франс Прес откри дека постојат контакти помеѓу официјално Скопје и официјална Атина за размена на споменици и други дела кои во земјата асоцираат на хеленската култура од античкиот период.

„Има иницијативи за институционална размена на споменици, како размена на подароци меѓу две пријателски земји”, додаде тој, без да го објасни дополнително својот одговор.

Според Преспанскиот договор, од Скопје се бара да го преиспита статусот на спомениците кои потекнуваат од грчката историја. Говорејќи за АФП, Заев рече дека метални плакати ќе бидат поставени пред некои локации зада “појаснат дека тоа е дел од глобалното културно наследство”.

Пред еден месец Владата во Скопје и грчката министерка за култура Мирсини Зорба ја демантираа информација објавена во грчките медиуми, според кои споменикот „Воин на коњ“ би заминал за Атина, а атинскиот „Тркач“ да пристигне во Скопје. Оваа информација за медиумите ја објави скулпторот на „Тркачот“ Костас Вароцос.