Пакетот закони поврзани со „Бехтел и Енка“ ќе бидат гласани наеднаш, ден кога- не се знае
Коридорите „врват“ низ собраниските сали . Извесно е дека финалното гласање за законите ќе биде кога сите пет ќе поминат на комисиска расправа. Пратениците и денеска истовремено на два фронта, додека комисијата за европски прашања стигна до законот за градење , последниот собраниски филтер го минува законот за урбанистичко планирање .
Опозицијата предупредува дека со овој закон ќе се дозволи градење без урбанистички планови . Главните забелешки се за начинот на кој се носат законите, а власта го кажува истото оправдување , европското знаменце е за да се избегне блокада.
Ваквите непромислени постапки, едно е што се прави штета на домашнен терен, се нарушува законодавноправниот систем, второ е што се нарушува превземената обврска од Македонија преку спогодбата за стабилизација и асоцијација, порача Антонијо Милошоски од ВМРО ДПМНЕ
Повеќе од еден месец вашите колеги не ги свикаа тие комисии и се премина на друг начин кој што доволува Деловникот, рече Бајрам Кадриу – ДУИ
Препукувања меѓу власта и опозицијата во сличен тон, во исто време можеа да се слушнат во соседната сала од оваа расправа. Комисијата за европски прашања, втор и последен ден расправаше за законот за градење , трет од пакетот. Иако опозицијата предупредува дека вака ќе може да се гради без одобрение за градба , власта и тука со слични оправдувања – се е за побрза изградба.
Верувам дека сте го прочитале законот за утврдување на стратешкиот интерес . Такстативно се утврдува дека над 51 процент компанијата ќе зема од нашата земја, рече Беџет Реџепи – Заменик министер за транспорт и врски
Истиот тој закон за кој велите дека треба да прочитаме од него, вие денеска го менувате. Со ништо не може да ја покриете нетранспарентноста, рече Александар Велјановски од ВМРО – ДПМНЕ
Иако законските решенија ги следат бројни критики, дебатата во Собранието досега покажува дека власта нема намера да прифати ни еден амандман и веројатно ќе ги протурка во првичната форма во која што стигнаа од Владата.
Кристина Алексиеска
