Организација на потрошувачи: Мерки сега и веднаш, инфлацијата не е зауздана
Сиромаштијата е една од главните причини за иселувањето. Поради постојаниот раст на цените голем дел од оние кои до неодамна живееја колку – толку добро, сега едвај го протурукуваат месецот. Од Организацијата на потрошувачи бараат мерки сега и веднаш и велат дека кај нив постојано стигнуваат поплаки за енормните поскапување. Од први септември ќе има нов бран поскапувања, ДДВ-то за голем дел од храната ќе се зголеми од 5 на 18 проценти.
Економски мерки сега и веднаш, зашто народот не смее да го понесе најтешкиот товар од инфлацијата, алармира Организацијата на потрошувачи, откако цените се вивнаа до небо. Велат, постојано пристигнуваат поплаки од граѓаните дека нема ден, а да нема ново поскапување на храната. Според Маријана Лончар Велкова, Комисијата за заштита на конкуренција треба да реагира за да види дали има здружување на трговците по толкавото, како што истакна, „плафонирање“ на цените производите.
- „Знаеме дека замрзнувањето на цените е популистичка мерка и дека имаме пазарна економија, но во вакви ситуации не треба да се чека, треба да се излезе со точна проценка и да се преземат мерки зашто се оди на товар и на штета на потрошувачот. За основните намирници мислам дека не треба ни да се зборува. Поради високите цени, многу граѓани купуваат производи со помал квалитет или со помала нутритивна вредност, а пристапот до основните прехранбени производи е елементарно човеково право. Потрошувачот мора да има пристап до основните потрошувачки добра, особено храната – млеко, сирење, путер,“ нагласи Лончар Велкова.
Лончар Велкова додава дека се потребни подобро осмислени владини мерки за ограничување на цените, за сите да може да се прехранат.
И додека надлежните допрва ќе анализирале дали треба или не, да се воведат мерки, прехрамбените и млечните производи поскапеа преку ноќ, а цените на овошјето и зеленчукот остануваат високи.
- Мерки за инфлацијата може да нема, а може и утре да има. Треба да имаме конкретни анализи дали неоправданиот раст на цените е кај производителите или е во ланец на трговија, или во производство. За повеќе производи сме зависни од увоз, и во тој дел не може да влијаеме на производни цени. За домашно производство имаме механизми и ги имплементираме: фирмите добиваат милионски суми поддршка од државата за инвестиции. Неприфатливо е да се книжат тие трошоци за инвестиции и да се вградуваат во цената, вели Бектеши.
Претходно, вицепремиерот за економски прашања Фатмир Битиќи потврди дека кај дел од големите трговци ланци е забележано нефер однесување. Тој не сакаше да соопшти за кого станува збор но, како и министерот економија, Бектеши, најави санкции за сите.
Од септември и еден куп производи ќе добијат повисоко ДДВ, и од сегашните 5% ќе се зголеми на 10 отсто.
Борис Грујоски
