Кинотеката на Македонија стана член на Европската мрежа на киноприкажувачи

Кинотеката на Македонија од овој месец стана член на Европската мрежа на киноприкажувачи – „Europa Cinemas“.Главните цели на оваа европска мрежа се да обезбеди оперативна и финансиска поддршка на кината кои се обврзуваат значаен дел од нивните прикажувања да заземаат европски филмови кои не се од национално потекло, како и да реализира активности за младата публика.

Како што соопшти Кинотеката на македонија, поддржана уште од зачетокот од страна на Европската комисија (Креативна Европа / Програма за медиуми) и од Националниот центар за филм на Франција (CNC), Европската мрежа на киноприкажувачи  е првата мрежа на кина кои се фокусираат на европски филмови. Создадена е во 1992 година од страна на група од 30 киноприкажувачи, а за 25 години прерасна во мрежа која обединува повеќе од 1.100 кино сали (скоро 3000 филмски платна) во 43 држави. Преку спроведените програми за поддршка и Еуроимаж таа се прошири и надвор од Европа во Азија и Канада со што придонесува европската културна разновидност да се споделат низ светот.

-Голема е честа што сме членови на оваа мрежа на европски киноприкажувачи. Сепак, одговорноста е поголема, не само кон здружението на кое станавме член, туку и кон нашата верна публиката која секогаш знае да препознае квалитетни филмови, а тие во голема мера доаѓаат од европската кинематографија кон која припаѓа и нашата македонска кинематографија. Оваа година Кинотеката бележи рекордна „реколта“. Рекордот е веќе достигнат, а целта од 15.000 посетители на кинопретставите во Кинотеката до крајот на 2018 г., кон која стремевме на почетокот на годината, е веќе извесна. За следната година се надеваме на уште подобри резултати и уште побогата филмска програма што ќе ја реализираме и со помош на финансиските средства што ќе се обезбедат преку членството во оваа мрежа“, вели Владимир Ангелов, в. д. директор на Кинотеката на Македонија по повод членството во европската мрежа на киноприкажувачи.