Историјата се менува на сите страни: И македонско-грчката комисија за ревизија на учебниците заседава во Атина

Заедничкиот интердисциплинарен комитет на експерти за историски, археолошки и образовни прашања од Македонија и Грција, од утрово ја почна третата по ред дводневна средба за учебниците. Целта според грчката страна е „книгите во учебната 2019-2020 година да не содржат иредентизам и ревизионизам“.

Последниот состанок се одржа во Скопје на 22 и 23 март, а во заедничкото соопштение министерствата за надворешни работи на Македонија и Грција најавија дека на следната средба „се очекува работата од вториот состанок да биде надградена и унапредена, а со цел да се формулираат препораките за идно одобрување од страна на Советот за соработка на високо ниво“.

На минатиот состанок, од министерствата соопштија дека во колегијална и конструктивна атмосфера, двете делегации „особено внимание посветија на прашањето за наставните програми и учебниците што се во употреба и договорија нивно усогласување, согласно духот и словото на Преспанскиот договор“.

Заменик министерот за надворешни работи на Грција, Маркос Боларис, кој воедно го предводи грчкиот тим во Комитетот за учебниците на прес конференција во грчкото МНР, како што завчера објави МИА, изрази оптимизам дека од следната учебна 2019-2020 година, Заедничкиот интердисциплинарен комитет на експерти за историски, археолошки и образовни прашања, ќе успее да ги отстрани иредентизмот и ревизионизмот од учебниците.

Јас верувам дека штом постои добра волја, ќе успееме. Ова впрочем е и мандатот. Мандатот вели дека учебниците во септември нема да имаат иредентизам и ревизионизам. И како што сфаќате, многу е важно да одговориме на овој договор, за да не оставаме простор на никој што има лоша намера да рече лесно беше договорено, но не се направи. Се фокусираме за да го имаме најдобриот можен резултат и ќе го имаме, вели заменикот шеф на грчката дипломатија, Маркос Боларис.

Одговарајќи на прашањето на дописничката на МИА од Атина, Боларис објасни дека мандатот на Комитетот произлегува од потпишаниот Меѓународен договор меѓу двете држави, за книгите во учебната 2019-2020 година да не содржат иредентизам и ревизионизам и додава дека Комитетот не сака да води процеси кои траат долго.

Истакна дека од моментот кога во Преспа договорот беше конкретните работи да се отстранат од масата, „треба да излезат и од книгите, бидејќи кога се изучува ова се создава проблем во општествата и кај народите“.

Претходно на дводневната петта средба на Заедничката комисија за историски и образовни прашања помеѓу Република Северна Македонија и Република Бугарија, што се одржа во Софија, била разгледана можноста за заедничко чествување и на Гоце Делчев.

На претходните средби, заедничката Комисија постигна согласност за препорака до владите на двете држави за заедничко чествување на Св. Кирил и Методиј, Св. Климент Охридски, Св. Наум, Цар Самоил и Григор Прличев.

МИА