Земјоделци контра Владата: Со замрзнување на цените надлежните свесно не носат во пропаст, пред очи ни тоне секторот -

Власта свесно сака да ни го земе лебот со низата погрешни чекори кои од ден во ден стануваат се покатастофални, алармираат производители на овошје и зеленчук откако Владата стави мраз на цените на 11 земјоделски производи. За земјоделците владината одлука е погубна за секторот. Велат дека со последното замрзнување тие се обесправени, но и дека ова води кон затворање на оранжерии и пропаст за градинарското производство во земјава кое и онака е на стаклени нозе, зашто мораат да продаваат под производната цена.

Јас доматот го земам за 170 денари, како овој производ да го давам за 70? Каде е логиката? Абе тие свесно сакаат во пропаст да не однесат и да нема веќе домашно производство, нека земат да товараат тие на Кванташки, нека видат колку пари ги земаме, па нека дојдат тука да видат како е, и после тоа од ракав нека тресат цени, мизерија, алармираат земјоделци во изјава за Алфа, откако власта си тера по свое и става мраз на артикли.

Земјоделците прашуваат како може за работниците да има 200 евра плата, а за функционерите 2.000?! Велат тие да ги засукаат ракавите и да растовараат по цел ден, па после да “тресат£, како што велат, цени од ракав.

Јас работам за 200 евра, ние сите тука работиме за да преживееме. А они, функционерите си зголемуваат до 2.000 евра плата?! Па нели е срамота тоа? И после од нас бараат да намалиме на цената?! Како?! За која заработка, немам коментар. Нека видат како да се растовара, да се оди на Кванташки, да се плака скапо, и да се работи по цел ден, алармираат производителите за Алфа.

Власта најави проширување на листата на замрзнати цени за овошје и зеленчук, со што, според земјоделците свесно ќе се ништат земјоделски сектори и ќе се дотолчи домашното производство.

Алармот од земјоделците доаѓа по владината одлука со која се замрзнуваат цените на доматите, краставиците, кромидот, карфиолот, пиперот, гравот, леќата, бананите, портокалите, мандарините и лимонот. Па така, килограм домати не смее да се продаваат над 70 денари, краставиците до 75, а максималната цена на пиперките ќе биде 90 денари.

Претходно и други произвoди добија „мраз“ меѓу кои и лебот, макароните, јајцата, оризот. Одлуката за замрзнување на цените за дел од економистите била нужна и дека тешко би го подобрила животниот стандард на граѓаните.

Борис Грујоски