ЕП ја поддржа употребата на канабис во медицински цели

Европратениците, охрабрени од одлуките на Светската здравствена организација, усвоија резолуција со која се поддржува употребата на канабис во медицински цели и бараат дополнителни истражувања на тоа поле.

Пратениците побараа од Европската комисија и од властите во земјите членки на ЕУ да дефинираат што е медицински канабис, со цел да се спречат злоупотреби, а воедно и да се обезбедат финансиски средства за новата истражувачка програма за ефектите од канабис.

– Истражувањата за примена на канабисот во медицински цели и понатаму продолжуваат, истакна еврокомесарката за заштита на потрошувачите, Вера Јурова.

Со сеопфатна регулација на лековите на база на канабис треба да се ограничи црниот пазар и да се обезбеди загарантиран квалитет на производите, но и да се ограничи пристапот на малолетници до канабисот, оцени Европскиот парламент.

Во текстот од резолуцијата се наведува дека е важно да се дефинира можноста за правна безбедност, како и пристапот на пациентите кои би го користеле канабисот за медицински цели, со посебни мерки за претпазливост кон помлади лица и бремени жени.