Едно во опозиција друго на власт – Заев контра барањето на Мицкоски за ЈО

Едно во опозиција друго на власт. Она што го ветуваше СДСМ пред да влезе во седиштето на Илинденска број 2, па дури и го повторуваше во првите неколку месеци од мандатот сега не важи.

„Две години по преземањето на власта ќе создадеме правен основ јавниот обвинител да се бира на предлог на опозицијата“ стои во предизборната програма на СДСМ.

Ова премиерот го повтори еден месец откако седна на фотелјата.

Две години изминуваат за нешто повеќе од два месеци, но сега премиерот не е расположен да го испочитува ветеното и договореното. На власта сега не и се допаѓала опозицијата.

Изборот на нов јавен обвинител и судбината на СЈО беа една од темите на која синоќа дискутираа лидерите на двете најголеми партии – конкретен договор не падна. Претседателот на ВМРО – ДПМНЕ, Христијан Мицкоски, уште еднаш го повтори барањето на неговата партија.

ВМРО – ДПМНЕ веднаш по референдумот кој се одржа лани во септември, побара смена на државниот јавен обвинител со нов, предложен од страна на опозицијата. Тој ќе требаше да ги испита сите нерегуларности на референдумот, гласањето на секои пет секунди, а требаше да го чешла и целокупното владеење на СДСМ.

Биљана Божиновска