Европската Комисија ја отфрла целта на Мишел за проширување на ЕУ до 2030

Извршната власт на ЕУ инсистира дека нема конкретна временска рамка за прифаќање на нови земји-членки. Како што обелодени „Политико“, Европската комисија денеска ја соборила целта на Шарл Мишел за проширување на ЕУ до 2030 година.

Двете највисоки институции во Брисел повторно се судрија додека извршната власт на ЕУ се спротивстави на забелешките на претседателот на Европскиот совет дека блокот треба да биде подготвен да прифати нови членки во 2030 година.

„Ние не сме фокусирани на датум, туку фокусирани на многу тесна соработка со земјите кандидати за да се подготвиме за пристапување во Европската унија“, рече заменик-портпаролот на Комисијата, Дејна Спинант, на денешниот брифинг со новинарите.

Таа додаде дека Мишел не се консултирал со претседателката на Комисијата Урсула фон дер Лајен за содржината на неговиот говор за проширувањето во понеделникот на самитот во Блед, Словенија.

Последното јавно несогласување меѓу Фон дер Лајен и Мишел – наречено „чудна двојка во Европа“ поради нивните тешки односи – доаѓа додека темата за проширувањето на ЕУ добива на интензитет во Брисел. Истовремено и францускиот претседател Емануел Макрон предложи ЕУ со „повеќе брзини“ во врска со пристапувањето на земјите кандидати.

Некои балкански народи чекаат со години да се приклучат на ЕУ; според законската рамка, тие мора да исполнат голем број барања пред тоа да стане возможно. Лидерите на ЕУ ќе се посветат на оваа тема на претстојниот самит во октомври, бидејќи војната во Украина повторно ја поттикна дебатата за проширувањето на блокот. Осум земји чекаат, вклучувајќи ги Украина и Молдавија, на кои им беше доделен статус кандидат минатата година – со зголемување на притисокот за отворање на пристапните преговори за Украина до крајот на оваа година. Спинант инсистираше на тоа дека проширувањето е „процес заснован на заслуги“ и дека на земјите кандидати треба да им се дозволи да се приклучат само откако ќе ги исполнат критериумите за влез во ЕУ.