Граѓаните чести клиенти за брзи кредити, просечно зајмуваат до 400 евра

Граѓаните се почесто земаат брзи кредити, а од година в година се почесто расте бројот на трансакции. Земаат просечно меѓу 200 и 400 евра кредит, а само лани 7% од кредитоспособното население во земјава било опслужено од овие финансиски друштва. Најчести корисници на услугите се физички лица, односно група потрошувачи кои не се услужени во банкарски сектор. За поголема сигурност за потрошувачите дел од овие друштва што работат во земјава формираа Асоцијација.

– Целта е да работиме заедно во обезбедување унифицирани стандарди за квалитет на индустријата и да изградиме контруктивен дијалог со законодавците и надзорните органи, рече денеска претседателот на Асоцијата, Филип Димитровски, кој е извршен директор на друштвото „Тиго“.

Дека граѓаните се почесто земаат брзи кредити потврди и првиот човек на „Иуте“ кредит. Вели дека прават се за корисниците да бидат точно и на време услужени.

Додава и дека не е загрижувачки процентот на неможноста за наплата на кредитите. Вели имаат механизми за проверка на клиентите и дека во случај на не враќање на средствата може да ангажираат надворешна компанија и на крај и извршител.

Од финансиските друштва посочија дека за разлика од банкарскиот сектор имаат поголеми трошоци, и дека секторот работи со загуба.

Секторот на небанкарски финансиски услуги се развива брзо ширум светот. Ваков тренд има и во земјава на што укажуваат и бројките на издадени кредити од 4,6 милиони во 2016, 17,5 милиони евра во 2017 и за 2018 очекуваат двојно зголемување во однос на 2017 година.

Кај нас првото финансиско друштво се отвори во 2011 година. Сега се активни 24 друштва, а во асоцијацијата на почеток се вклучени седум, кои денеска потпишаа и Кодекс за добра пракса, со цел обезбедување повисоко ниво на заштита и јасни правила на соработка со клиентите кои добиле или планираат да земат заем.

Борис Грујоски